C7 – Tátal

Is é an tátal a bhaineann an taighdeoir as an taighde a rinneadh ná go bhfuil bearna aitheanta sna hacmhainní teanga Gaeilge atá ar fáil agus go bhfuil éileamh suntasach ar fhoclóir mór lánGhaeilge i measc grúpaí áirithe. Agus moltaí éagsúla ó rannpháirtithe curtha san áireamh, dar leis an taighdeoir tá dhá rogha phraiticiúla ann chun foclóir mór aonteangach a chur ar fáil laistigh de chúpla bliain, gan costas ard.

  1. Smaoineamh amháin is ea cead a lorg ón nGúm chun an Foclóir Beag a fhorbairt, a nuashonrú agus a chur leis ar bhonn leanúnach. Is fiú fiosrú leis an nGúm faoi na féidearthachtaí atá ann. Ní raibh an taighdeoir in ann teacht ar aon eolas faoi phleananna don Fhoclóir Beag amach anseo.
  2. Is é an dara smaoineamh, agus hipitéis an tráchtais seo, gur féidir foclóir mór lánGhaeilge a chruthú as sonraí Líonra Séimeantach na Gaeilge agus an bhearna sna hacmhainní teanga Gaeilge a líonadh.

Measann an taighdeoir go mbaineann buntáistí faoi leith le foclóir lánGhaeilge a chruthú as líonra séimeantach seachas as bunachar sonraí atá múnlaithe d’fhoclóir amháin. Liostaítear na fáthanna anseo:

  • De bharr líonra na ngaolta séimeantacha in LSG, bheifí in ann an t-eolas a thaispeáint don úsáideoir ar bhealach níos saibhre agus níos solúbtha ná mar a dhéantar i ngnáthfhoclóir leictreonach.
  • Chuideodh sé le háiseanna nua teicneolaíochta a fhorbairt don Ghaeilge sa todhchaí mar is uirlis thábhachtach í líonra séimeantach i réimse na ríomhtheangeolaíochta.
  • Dá ndéanfaí forbairt chuí air, d’fhéadfaí Líonra Séimeantach na Gaeilge a chur le EuroWordnet agus chuideodh sé sin go mór le cumarsáid a dhéanamh go hilteangach gan a bheith ag brath ar úsáid an Bhéarla mar idirtheanga. Dar leis an taighdeoir, bheadh seasamh níos láidre ag an nGaeilge i measc teangacha na hEorpa dá bharr.

In Translation and Globalisation deir Cronin:

‘In the case of minority languages which are not dominant in their own national territory, commitment to technological advance has a strategic importance.’ Cronin (2004:150)

Feictear go bhfuil aitheantas tugtha don tuairim sin ag an stát tríd an bhforbairt atá á déanamh ar Nua-Chorpas na hÉireann agus ar thionscadail chorpasbhunaithe cosúil leis an bhFoclóir Nua Béarla-Gaeilge agus Foclóir Stairiúil na Nua-Ghaeilge.

Measann an taighdeoir gur uirlis theangeolaíoch de chineál eile é Líonra Séimeantach na Gaeilge, agus gur féidir é a áireamh mar cheann tábhachtach a bhaineann leas as an teicneolaíocht is nua-aimseartha.   Áitíonn Cronin:

‘It is arguable that the minority status of language in the translation situation no longer relates to the number of speakers and the existence of a publishing infrastructure, but to the implementation of the language in technological developments.’ (ibid).

Is áis cheannródaíoch í Líonra Séimeantach na Gaeilge i dtuairim an taighdeora agus b’fhiú é a fhorbairt agus a chothú ionas go mbeidh an Ghaeilge i lár an aonaigh maidir le forbairtí nua a bhaineann leis an ríomhtheangeolaíocht. Aontaíonn an taighdeoir le tuairimí Cronin, agus leis an tuairim atá ag Scannell a mhaíonn go bhfuil ról ríthábhachtach ag an teicneolaíocht le go mbeidh an Ghaeilge in ann a fód a sheasamh i saol domhandaithe na linne seo.

‘Given the constant pressure from English (particularly in technical domains) I believe it is essential to focus on producing software that delivers some immediate benefit to Irish speakers. The hope, of course, is that providing high-quality Irish software will strengthen the language by reducing (by one) the number of domains in which one is forced to use English. From a sociolinguistic perspective, the technical sphere represents a key battleground in the fight to halt or reverse language shift, particularly in light of Ireland’s swiftly developing reliance on technology and the common negative associations of the language with a (real or imagined) backward, rural past.’ (Scannell: 2003)

Tugann Líonra Séimeantach na Gaeilge an deis do lucht scríofa na Gaeilge foclóir mór lánGhaeilge a shaothrú dóibh féin i mbeagán ama agus ar bheagán costais. Bheadh meitheal oibre agus saineolas deonach ag teastáil chun saothar d’ardchaighdeán a chur i gcrích. Measann an taighdeoir gur fiú an deis sin a thapú.

Advertisements

Freagra

Líon amach do chuid faisnéise thíos nó cliceáil ar dheilbhín le logáil isteach:

Lógó WordPress.com

Is le do chuntas WordPress.com atá tú ag freagairt. Logáil Amach / Athrú )

Peictiúr Twitter

Is le do chuntas Twitter atá tú ag freagairt. Logáil Amach / Athrú )

Pictiúr Facebook

Is le do chuntas Facebook atá tú ag freagairt. Logáil Amach / Athrú )

Pictiúr Google+

Is le do chuntas Google+ atá tú ag freagairt. Logáil Amach / Athrú )

Ceangal le %s